۲/۰۵/۱۳۹۰

پاییز...!

لە بیرمە یەکەم وشەیەیک کە بۆ فەریدەم نووسی "پاییز" بوو. پێم گوت پاییزەکەم! نازانم بۆ وام پێ گوت؟! ڕەنگە لە بەر ئەوەی یەکەم جار کە بینیم کراسێکی سەرتابەخوار زەردی لە بەر دابوو. یان لە بەر ئەوەی کە رەنگی پرچەکانی لە گەڵا زەردەکانی دارستانە تەسکەکانی بناری قەندیل دەچوو ئەو کاتەی دیمەنێکی ئەفسانەییان لە سەرەتای پاییز بەدی دێنا. ئەو پاییز بوو. وەکوو هەموو ڕووداوە گرینگەکانی ژیانم کە چاوەڕوانی هاتنی پاییز دەبوون و ئینجا دەقەومین. ئەمڕۆ کە جارێکی تر ئەم وشەیەم بە زمان هێنا فەریدە گوتی:"لە بیرتە یەکەم جار وات پێ گوتم؟" لە بیرم بوو. زۆر لە مێژ بوو ئەم وشەیەم لە بیر کردبوو. ڕەنگە لە بەر ئەوەی ئاوارەیی و پەنابەری هەموو شتێکی لە بیر بردبوومەوە. لە بەر ئەوەی کە لەو وڵاتە قا‌قڕەی ئێستا لێی دەژیم دیتنەوەی پاییز زۆر ئەستەمە. ژیانی ئەمریکا زۆر ترسناکە. هێندە ترسناک کە ئەگەر بێت و مرۆڤ وشیار نەبێ هەموو شتێکت لە بیر دەباتەوە. تەنانەت ئەو ئامانجانەی کە لە پێناویان دا ئامادە بووی هەموو شتێک و تەنانەت گیانت فیدا بکەی. ئەمریکا بۆ ئەوەی شتێکت بداتێ، شتێکت لێ دەستێنێ. دەبێ مرۆڤ وشیار بێ نرخی ئەو شتانەی وا بە دەستیان دێنێ زیاتر بێ لەو شتانەی وا لە دەستیان دەدا. لێرە هیچ شتێک ئەو جۆرە نیە کە لە وڵاتی خۆمان تەجرەبەمان کردووە. هێندەی کە لە وڵاتی ئێمە کوشتن و خوێن ڕشتن و لە سێدارەدانی ئاشکرا هەیە، لێرەش کۆمەڵێک بێ ڕەحمی لە خۆی دا شاردۆتەوەو دڵتەنگی قەت دیوارە کورتەکەی بەر ماڵی هیچ پەنابەرێک بەرنادا.
وەک بڵەی تاسەی دیتنی پاییزەکانی کوردستان قەت کۆتایی نەیە، هەموو ڕۆژێ جارێک بیر لە مەرگ دەکەمەوە. بووین بە بینەر. ئیتر لەو هەموو دڵەڕاوکێ و ئەوین و ترس و هەڵات هەڵات و کۆبوونەوەو گریان و تۆران و ئاشت بوونەوە، تەنیا ترسی ئەوە ماوە کە تۆ بڵەی دوو پارتی سەرەکی ئەمریکا لە سەر بودجەی ئەمساڵ پێک بێن یان نا؟! ژیان لێرە زۆر پێکەنینیە. لانی کەم بۆ من کە قەت لەو دەلاقەوە سەیری ژیانم نەکردووە. لە گەڵ تەواوی ئەو شتانەدا لە هەوڵی ئەوە دام کە لە بیرم نەچێتەوە بۆ لێرەم. بەڵام دڵنیام کە هەموو دەرفەتەکان بە کار دێنم بۆ ئەوەی لێرە نەمرم. دەتوانم بیر لە مەرگ بکەمەوە لێرە، بەڵام قەت ناتوانم لێرە بمرم...
...
لە کوێ دەستم پێ کرد و گەێشتم بە کوێ. ژیانیان وەها پێ تاڵ کردووین کە تەنانەت ناتوانین دوو ڕەستە بۆ ئەوین بنووسین. بەڵام لە لە گەڵ هەموو ئەو شتانەدا هەبوونی پاییزێک کە ڕەنگ و بۆنی کوردستانی پێوەیە، لەو وڵاتە کاول کراوەدا هەستێکی هێندە بە تین و گەرمم دەداتێ کە لانی کەم لە بیرم ناچێتەوە خەڵکی کوێم و دەبێ رۆژێک بگەڕێمەوە بۆ کوێ.
پاییزەکەم! تۆ تەنیا بیرەوەری کوردستانی کە هێشتاش هەر لە گەڵمی و دڵنیام ڕۆژێک پرچە زەردە درێژەکانت ڕێگای کوردستانم بۆ خۆش دەکەنەوە... .

***
پ . ن: لەو هەل و مەرجەی کە لە باشووری کوردستان هەیە و ئەو نەکبەتیەی کە نایهەوێ بەرۆکی ئەو خەڵکە بەردا نووسینێکی ئاوا نۆستالۆژیک لە سەر کوردستان زۆر پێکەنینیە. مرۆڤ بوونەوەرێکی سەیرە...

3 ڕوانگە:

ناشناس گفت...

ئه نوه ر گیان دوور نی ئه و روژه ی جاریکی دی ل قه راغ سه ددی دانیشین و ....
رضا

انور حسن پور گفت...

کوا ڕەزا گیان تۆ ىلەی ئەو ڕۆژە بێتەوە؟!

kakesur گفت...

نازانم ئەو رەزایەی ئەو روانگەیەی لە ساڵی ٩٠ داناوە ئەمنم یان کەسێکی دیکە بووە؟؟!!! بەڵام ئەنوەر ئەمن ئێستا رەزام، ئەو رەزایەیی کە دەزانی کێم، ئەگەر رۆژێکیش بتوانین بچینەوە قەراغ سەددی مەهابادێ ، ناتوانین ببینەوە ئەو ئینسانانەی کە بووین ! یان ئێمە زۆر لە خۆمان دوور بووینەوە یان ژیان ئەوەندە لە ئێمە دوورە کە نە بسکە زەردەکانی فەریدە، نە ئەفسانەی پاییز رێگەمان نادەن نزیک ببینەوە لەو شتەی کە ساڵانی دوور بووین. ئێمە و ژیان ئێستا شتێکی ترین.
بریا ئەلان ، ئەو شەو ئەو قسەیەی منت خوێندباوە

ارسال یک نظر

Newer Posts Older Posts